توعلموں بس کریں او یار کلام بابا بلھے شاہ
 |
توعلموں بس کریں او یار |
توعلموں بس کریں او یار
وے بولدے دی تینوں سمجھ ہے ناں
جیہڑا نت تیرے وچ بولدا ای
بھُلا آپ پھریں ٹولیں باہر اوس نوں
وانگر مرغیاں دے کُڑا پھولدا ای
بھَلا بُجھ خاں کون ہے وچ تیرے
شیت اوہ ہووے جیہنوں ٹولدا ای
بلھے شاہ جدا نئیں رب تیتھوں
آپے واج ماریں آپے بولدا ای
تیری بھلّ بھلایا تینوں ذرا کھول اکھیں تو کوئے
پھڑمرشد نوں تیرا کھول گیا عقدا
ہستی چھڈ کے تو ویکھ بلھے شاہ جدا نام جھپے تو سوئے
توعِلموں بس کریں او یار!
حضرت بابا بُلّھے شاہ دا کلام
توعلموں بس کریں او یار
پڑھ پڑھ عالم فاضل ہویا
اپنے آپ نوں پڑھیا ای نئیں
جا جا وڑدا مندر مسیتاں
من اپنے وچ وڑیا ای نئیں
اینویں روز شیطان نال لڑدا
نفس اپنے نال لڑیا ای نئیں
بھلے شاہ اسمانی اڈدیاں پھڑدا
جیہڑا گھر بیٹھا اوہنوں پھڑیا ای نئیں
توعلموں بس کریں او یار
سر تے ٹوپی تے نیت کھوٹی
لینا کی ٹوپی سر دھر کے
تسبیح پھِری پر دل نہ پھریا
لینا کی تسبیح ہتھ پھڑ کے
چلے کیتے پر رب نہ ملا
لینا کی چلیاں وچ وڑھ کے
بُلھے شاہ جاگ بنا ددھ نئیں جمدا
پانویں لال ہوئے کڑھ کڑھ کے
توعلموں بس کریں او یار
پڑھ پڑھ علم لگاویں ڈھیر
قرآن کتاباں چار چوفیر
گردے چانن وچ انھیر
باہجھوں راہبر خبر نہ سار
توعلموں بس کریں او یار
پڑھی نماز تے نیاز نہ سِکھیا
تیریاں کِس کَم پڑھیاں نمازاں
علم پڑھیا تے عمل نہ کیتا
تیریاں کِس کَم کیتیاں واگاں
نہ کَہر ڈِٹَھا نہ کَہر والا ڈِٹَھا
تیریاں کِس کَم دِتیاں نیازاں
بُلھے شاہ پتہ تَد لگ سی
جدوں چِڑی پَھسی ہتھ بازاں
توعلموں بس کریں او یار
پڑھ پڑھ شیخ مشائخ ہویا
بھر بھر پیٹ نیندر بھر سویا
جاندی وار نین بھر رویا
ڈبّا وچ او رار نہ پار
توعلموں بس کریں او یار
پڑھ پڑھ نفل نماز گزاریں
اُچیاں بانگاں چاہنگاں ماریں
ممبر تے چڑھ وعظ پکاریں
کیتا تینوں حرص خوار
توعلموں بس کریں او یار
پڑھ پڑھ مُلاں ہوئے قاضی
اللہ علماں باہجھوں راضی
ہووے حرص دونوں دن تازی
نفع نیت وِچّ گزار
توعلموں بس کریں او یار
پڑھ پڑھ مسئلے روز سناویں
کھانا شک شبے دا کھاویں
وسیں ہور تے ہور کماویں
اندر کھوٹ باہر سچیار
توعلموں بس کریں او یار
پڑھ پڑھ شیخ مشائخ کہاویں
اُلٹے مسئلے گھروں بناویں
بے عقلاں نُوں لُٹ لُٹ کھاویں
اُلٹے سدھے کریں قرار
علموں بس کریں او یار
جد میں سبق عشق دا پڑھیا
دریا وبکھ وحدت دا وڑیا
گھمن گھیراں دے وچ اڑیا
شاہ عنایت لایا پار
توعلموں بس کریں او یار
0 Comments: